新郎綠帽復仇記! 未婚妻同偷情上司下場超慘

現實有時比電影劇情仲精采!日本一名新郎哥於婚宴當日大爆未婚妻同上司偷食,當住咁多位賓客面前公開兩人嘅偷情相,情節同「MK活地亞倫」葉念琛套《人約離婚後》有得揮!

根據日本女性話題網站《女子SPA》,化名桃田幸惠嘅讀者有次出席一場結婚酒會,男女家親戚朋友、上司及同事都有出席,會場瀰漫一片幸福氣氛。直至新娘嘅上司致詞後,新郎突然企起身拎咪,直指新娘同佢上司有路!

上司當然大聲警告佢唔好亂講,好彩新郎早有準備,拎出一疊兩人嘅偷情相於席間傳閱,喺車到又攬又錫、一齊喺時鐘酒店出來嘅相都有,然後新郎就離開會場呢個傷心地。

新娘當場成個人僵硬哂,全程冇出過一句聲,咁上司呢?原來當晚佢係攜眷出席,老婆嬲到出汁即閃,上司唯有追出去。新郎父母、新娘相繼走入新娘房,呢場鬧劇亦於30分鐘後完場。

綠帽唔怕戴,最緊要除得快!事後桃田丈夫聯繫新郎,得知佢早喺結婚前個半月已經知道未婚妻出軌。最後婚事當然告吹,所有儀式費用全部由女家負責,亦有畀補償金新郎,另外上司亦畀咗近千萬日圓補償金。偷食男女下場慘烈,上司被公司炒魷魚,老婆亦決定同佢離婚,新娘事後亦冇喺公司出現過就直接辭職。

偷食有代價架,你睇黃心穎就知啦。

圖片來源:《女子SPA》