日本女人唔鍾意男人要找錢:斤斤計較

畀錢買嘢時,好多時會畀整數錢方便店員找,不過呢個咁貼心嘅行為喺日本妹眼中,竟然係核突嘔心!

早前有男網友於日本論壇2ch發文:「埋單畀680円時,我拎1180円出嚟,隔離女生話我好嘔心!」男生原意都係想方便店員齊頭找500円啫,喺香港都好常見呀,乜好核突咩?

呢個post立即引起網友激烈討論,亦掀起兩派網友一場舌戰,支持女生一方:「唔用電子貨幣都算,用現金都仲要計到盡真係好嘔心」、「仲核突過用優惠卷」…女網友嘅評價不外乎係核突、太小家,覺得男人會係一個斤斤計較嘅人。

幸好樓主is not alone,有一班巴打支持佢:「呢條女智商太低,唔駛理」、「係我就一腳踢開佢叫佢就收嗲啦」、「純粹唔想袋住一堆神沙,冇咩唔妥」,亦有人好理性從數學角度分析,幻想遇著計數唔叻嘅豬店員,情景就會變得好尷尬。

講開找錢,去日本買嘢零舍多散銀,不過大家有冇留意,就算再多散銀,收銀員找錢嗰陣都唔會令你手忙腳亂?有日本人就畫咗以下呢個收銀流程插圖出嚟:首先數完紙幣俾你睇,等你袋好再找碎銀,碎銀仲會放喺單據上面,方便你一嘢倒入散銀包,就係最正確最方便嘅找錢方法,講貼心都係唔夠日本人嚟!

圖片來源:twitter@M_Shiroh、www.pakutaso.com