星期一催至有:出Trip被人當去旅行 因為你做錯事

出Trip公幹,無論遠近總係令人又愛又恨,尤其唔係經常去嘅朋友,一有機會一定會既緊張又興奮,當然因為可以乘機離開Office,又可以見見國外嘅同事或者客戶,同時出Trip都要飽受舟車勞頓及時差之苦,有時公幹仲辛苦過自己公司做嘢。最最最慘係,辛苦之餘仲要唔知Office之中其他同事點諗,甚至有人會覺得你係「公費旅行」、「去玩多過做」,就係咁先最令人氣憤!有人話,空穴來風未必無因,其實係因為你做錯嘢咋!

FB曬飲食

去旅行貼下飲飲食食相就在所難免,但係出Trip做嘢就唔該你忍一忍手,唔好再貼喇;雖然唔係叫你24小時工作狀態,一樣可以有自己時間去遊樂,但如果自己貼出嚟,咪招人口實囉。

過度張揚

明白好多人出Trip前都好興奮,甚至會大講特講,喺公司講到全世界都知咁濟;其實好多人可能會妒忌你出Trip呢個機會,又或者視之為爭取表現嘅方法,你太高調,咪令人覺得唔忿氣,唱衰你囉。

帶家人朋友去

Stay before或者Stay behind就一定係死症啦,唔使多講,但好多人忽略咗,就係帶埋朋友、家人一齊去,無錯,你哋大家去到可能你有你工作,佢哋有佢哋去玩,但成個感覺畀人就係公費旅行;所以大家咪咁傻豬,就算要都咪畀人知!

催至有:80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、御。