星期一催至有:捨得辭職未?3大癥狀講你知係時候走

日日返工等放工?無心工作?提唔起勁?等等先,如果你因為以上呢啲原因就諗住要辭職,就太魯莽喇!因為幾乎99%人都係咁唔鍾意返工㗎啦!所以好多時要辭職並唔係咁容易決定到㗎。著名頭髮用品CEO兼創辦人Carolyn Aronson總結咗佢30幾年嘅工作經驗,定出「辭工先兆」3大決定位,假設你有以下3大徵狀之一,咁就應該快手辭工喇。

5天工作有3天都怕返工

如果一個5天工作周之中,有3天你都非常抗拒返工,甚至對返工有所不安及恐懼,好多人直頭一朝起身就感到焦慮不堪;證明你對工作產生厭惡感,而且毫無成就感,日日返工都係靈魂離開魂遊太虛。

工作感到煩悶

工作需要有成就感,當你發現你嘅工作開始枯燥乏味,而且覺得毫無挑戰性,可能係因為你已經成長咗,自然覺得工作太易;呢個時候就代表你要搵更大挑戰更多成就感。

工作表現差

每人都有自己專長,最後呢一點唔係問你自己係咪想辭職,而係代表你唔適合呢份工呀;當你老細、同事、甚至你自己都覺得工作表現未如理想的話,明顯指你唔啱呢份工啦。

 

催至有:80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、卸。