星期一催至有:GPA 2.9搵錢永遠比3.6嘅人多?點解?

成日話讀書唔好讀死書,細細個父母仲叫大家一定要讀好書,第時先可以有份好工,生活過得好好。嗱,現今世界有幾多大人物係大學讀到一半就無讀先?不過你實會話「唓,個別例子啫!」好,今日就同大學報導一下,原來根據美國最新一份調查指,全美700大富豪中,平均GPA竟然只有2.9!學者Eric Baker就指出,成績好嘅學生(GPA 3.6或以上)雖然多數會成為專業人士,搵到好工,但就難以致富喎,原因係:

學校鼓勵人模仿成功模式

所有學校同教育都係話畀你知成功嘅方法,一旦學生搵到,例如係讀書成績、操行、體育等,就只要遵循呢個模式就會成功;但工作並非如此,只有不循舊有模式嘅人先可以喺商業世界上成功。

學校要求點到即止

學校成績係按考試而定,而要考得叻,好多時只需要讀完課程要求就可以,換句話講,就算你對某一科目有幾熱誠,考試未必會睇到;但如果工作上,你可以盡情展現你嘅熱誠,而且回報係按你嘅熱誠成正比呢。

催至有:80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、御。