星期三催至有: 如何擦老細鞋又不失霸氣 不被同事嫌棄

大家都應該唔否認,「擦鞋仔」永遠係「最令人討厭」頭幾位;好正常,呢類擦鞋仔必定係不學無術,無料但憑一張嘴氹掂老闆,反而一股熱血投入工作嘅員工,永遠得唔到老細正視,呢個唔係多勞多得嘅現象,真係好令人氣憤。當然,古語有云:If You Can’t Beat Them,Join Them。但首先,唔係人人都有呢股能耐可以唔理個人屈辱,巴結老細;第二,唔係人人可以抵受被同事厭惡嘅目光。當然,擦鞋仔亦有聰明與蠢之分,其實可暗中擦鞋而又不被同事知道,同時亦可以瞞過自己良心一關。

多匯報工作進度

擦鞋仔最乞人憎原因之一,就係唔做嘢,又扮做嘢;而要做到聰明版,就係真係去做嘢,但就比其他人更多匯報自己工作進度,令老細可以完全明白你嘅能力,留低好形象。

同事面前做自己

做擦鞋仔,唔係光彩嘅事,醒目嘅擦鞋仔,可能就識得喺同事面前隱藏自己;所以喺老闆同其他同事在場嘅Moment,請收起討好老闆嘅態度,同時唔好畀同事知道老闆同你有幾親近。

守口如瓶

要得到老細歡心,唔一定要係咁出聲討好老闆,另一個方法係齋聽;無錯,成為老細嘅海綿,即係聽到咩就收收埋埋,千萬唔好多口周圍講;自然成為老細嘅心腹紅人。

催至有:80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、卸。