星期二催至有:有份工再搵工 係咪一定容易啲?

有雞先定有蛋先?從來都係千古問題。黃子華都曾經講句:「要有第一層樓,就會有第二層樓,咁第一層樓點嚟?」其實換轉喺職場,喺外國都有一句名言「It’s easier to get a job when you’ve got a job.」(如果你本身有份工,你會較容易搵到下一份工)原來喺外國,唔少公司都一樣對本身無工作嘅求職者心存偏見,最直接嘅疑問係「好人好姐,點解本身無工返?」無工返,唔代表係職場失敗者,其實今時今日啲老闆、HR仲唔化,咁會錯過好多人才架!

Gap Year

唔講後生一群嘅工作假期,就算上咗中年嘅朋友,一樣有做到悶做到樽頸嘅時候,辭咗份工休息一陣再出發,有時甚至打通任督二脈,功力大增呀!

健康理由

人人都希望自己身體健康,但又未必盡如人意,唔單止係身體上,呢個年代好多人都有精神上、心理上嘅健康問題,被迫離職等身體痊癒再上路,唔代表對方工作能力有問題呢!

催至有:80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、御。