星期五催至有:上網時間愈嚟愈多 但就愈嚟愈唔信任網絡

上網嘅人口,全球已經去到近40億,相信大家睇到呢篇文,都係其中一份子啦。預計上網人口仲要不斷上升,而網絡世界亦愈嚟愈重要,幾乎可以主宰我哋生活嘅一切,網絡世界嘅資訊同接收你嘅個人資料其實係成正比,即係話你睇幾多,同時間你嘅資料亦被吸收幾多。咁另一個問題係,你有幾相信宜家嘅網上世界係安全?你有幾覺得你嘅資料無畀人挪用?

根據最近一個有關網絡安全調查,發現普通用戶對於網絡世界都表示不信任!平均有52%至71%受訪者認為網絡世界唔能夠保障個人資料。其中破壞呢個信任嘅重要因素之一就係:廣告訊息。唔少用戶都覺得廣告訊息會跟蹤使用者,例如你喺網上商店睇過一件物品,隨後會不停喺各處網站都會見到該產品嘅廣告。由於呢個困擾因素,美國就有31%人決定唔再使用某啲服務,以避過廣告;中國更誇張,有成70%人表示停止咗使用某啲網站。

不過又唔怪得呢班網民,事關佢哋又真係好準,據估計,未來十年網絡世界靠利用網民嘅資料,將可以獲得近10億美金嘅利潤,所以話,大家上網嘅時候,都要小心唔好盡信呢!
 

催至有:
80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、御。