星期五催至有:公司冷氣凍過雪房?咩溫度可提升生產力?

講起公司,十個女同事,起碼有九個都會同意:公司冷氣好凍!無錯呀,好多同事甚至要羽絨都帶定,其實公司好多時開冷氣都係因為大廈中央系統,無法更改,並非真係想凍大家;不過早前英國原來有調查發現,最佳嘅冷氣溫度原來係21度,係最有效提升工作力咁話。

調查發現如果冷氣低過21度,會令員工專注力及精神都唔可以集中,更會令員工身體變弱,長遠嚟講係減低公司生產力呢。另外仲有一點好多公司可能忽略,就係冷氣要定期清洗,因為冷氣係傳播病箘嘅一大病源,可以令員工經常生病,即係又係會削低生產力。

另外呢,濕度其實係非常重要,大家都知冷氣係極度乾燥,會造成身體各種不適,所以體貼嘅公司應該留意埋公司濕度,可以補充一下公司水份,咁就照顧得非常周到喇!

催至有:80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、卸。