星期四催至有:辦公室只可以對人好 但切勿討好人

辦公室係返工之地,更係見盡人心之地,好多人會嘗試隱藏自己真性情,人人都希望表達善意,「釋出善意」簡直係每位打工仔嘅一大面具,希望做到面面俱圓。不過各位打工仔要注意一點,做好人係應該,但好人歸好人,切勿討好人呢!唔明呀?睇睇:

基本目的不同

做好人係對人好,而不計較原因,亦唔會考慮對自己有無著數;相反討好人,前設就係有事相求,或者希望為日後利益鋪路,基本上都已經有明顯出發點嘅唔同。

討好人食相差

要講嘅食相,當然就係指討好嘅手法啦;如果純為人好,當然問心無愧,行事亦光明磊落,要做嘅就做,唔想做就拒絕;相反討好人嘅因為含有利用成份,自必然有機心,好易畀人睇得出。

被睇穿無癮

雖則話好人大把,但呢類討好人嘅亦絕對唔少,其實太多老鬼,喺職場打滾多年嘅人都一早睇得出;而呢啲討好人嘅擦鞋仔通常都會被人排斥,最後好人又做唔成,著數又拎唔到!

催至有:80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、卸。