星期四催至有:80、90後拒絕討好上司 所謂何事?

對上司要尊重就一定㗎喇,不過好多人都有問題,就係當今討好老細嘅,通常唔會係一般80、90後,90後都仲可以話係入世未深,但80後嘅朋友又點解會開始唔對老闆尊重呢?莫講話拍老細馬屁,好多時甚至唔覺得老闆係一回事,乃至令老闆覺得從未受尊重。當然至有姐我唔係教大家一定要拍老闆馬屁,但其實細細個父母都會話「第時做嘢要識講嘢」,今時今日,其實呢班80、90後又係點面對上司呢?

老闆只係老屎忽

要尊重老闆,甚至討好老闆,必須要覺得呢位老闆值得尊重,但實際上目前80後遇上嘅係無得上位嘅社會困境,當然包括人工追唔上樓價啦,因此開始認為老闆呢一代只係生得逢時嘅老屎忽,即係「有運」先做到老闆。

驕生慣養長大

目前長大嘅80、90後無可否認係比從前嘅人更加喺溫室之中長大,因為得到更多資源更多愛護,難免有一股天生嘅骨氣;令佢哋面對權力嘅象徵,例如老闆,就會自然產生一股反抗力,所以不屑討好老闆。

工作選擇多

以前嘅人返工,好多時候一份工打十幾廿十年,當然要親近老闆,慢慢升職上位有方法;但宜家嘅年輕人呢,東家唔打打西家,甚至裸辭都已經見怪不怪,轉工轉得咁快,討好老闆又為乜呢?

催至有:80後港女OL一名,每日返工即係扮工,熟讀辦公室生存之道,最愛煲韓劇,返工奉行三大宗旨:拖、推、卸。