有數計:老闆注意 每位員工每日花2.5小時解答愚問題

作為打工仔,就當然係凡事睇老闆頭,老闆有咩問題,當然會盡量去解答啦。不過老闆做得耐,好自然會開始習慣「所有嘢都會有答案」,而忽略咗其實每個答案,都係要費人力物力去搵出嚟,唔係電視咁Click一Click就有架。

《紐約時報》轉載國際人力資源專家Cy Wakeman嘅研究,指出原來每日每位員工平均要用2.5小時,去處理一啲「完全無用」嘅愚蠢問題。Cy話好多老闆都鍾意為發問而發問,繼而出現好多愚蠢問題,呢堆問題包括「點解」「邊個」「幾時」呢3大類。通常老闆問完,佢下面嘅團隊就會展開一個又一個嘅會議,去搵答案,而更多時候呢啲問題係對公司完全零幫助、零用處、零效益;即係話浪費咗同事嘅人力,浪費公司嘅財力。各位老闆,注意喇,要反省下自己喇,有時唔開口可能係幫忙呢。