有數計:重色輕友!英研究:每拍一次拖 無兩個死黨

成日話有異性冇人性,有時可能只係講下笑窒下拍緊拖嘅老友,但牛津一項研究話你知,拍拖嘅人真係會變得重色輕友,甚至拍一次拖就會失去2個死黨!

英國牛津大學做過一項研究,搵咗540個18歲至60歲人士,了解下佢地喺戀愛前後嘅閨蜜人數有咩變化,發現拍拖前嘅佢地通常平均擁有5個死黨,但一旦蜜運中,佢地嘅核心朋友圈就只可以容納4個人,當中包括埋自己嘅戀人,即係話其中2個死黨就要被犧牲。研究人員表示,因為男女拍拖時,的確會減少同朋友相處,所以變相無暇兼顧友情,最後只好白白斷送昔日糖痴豆嘅友誼,真係聞者傷心!

今次研究對於死黨嘅定義係,每星期至少見一次,或者面對危機時會求助嘅對象。如果你身邊都有咁好嘅閨蜜或者兄弟,記住要好好珍惜啊,千萬唔好因為沉迷愛情而犧牲朋友呢~