柏原太賀:兩個天堂(十九 – 完結篇)

柏原太賀
柏原太賀:兩個天堂(十九 - 完結篇)

Vincent 的說話,令婉婷不知應該擔心,還是放心。雖然她看來不必解釋跟耀達的關係,但到底 Vincent 知得有多深入呢?

眼見婉婷臉有難色,Vincent 卻向她展現暖心的微笑。

「妳覺得嫁一個比自己大十年的男人,有咩好相處呀?」Vincent 問。

「係咩呀?」婉婷心想這應該不是陷阱吧!但她還是選擇先裝一裝傻。

「就係可以必要時扮番一個細路女,叫妳身邊個大人包容妳以前嘅蠢事。而且,通常都會成功。」

「即係……你早就已經知道我以前嘅事?」

「其實,妳冇需要瞞我。我大妳咁多年,見過嘅人同面對過嘅事,自然會比妳多。所有人都有過去,喺我眼中呢啲只係經歷,連小事都稱唔上。」

「但係,對我嚟講真係太重要啦!」原本想向 Vincent 撒嬌的婉婷,卻轉眼間又再懊悔起來。「因為我之前曾經墮胎,所以我好驚會唔穩陣,結果……」

眼見婉婷又再落淚,Vincent 發現自己安撫的方法似乎不對,便以眼神向 Doctor Liu 求救。

「妳係唔係覺得如果冇咗個 BB,就對唔住 Vincent 呢?」Doctor Liu 問。

「嗯。」婉婷硬收起嗚咽,勉強地說:「我真係唔想因為過去嘅錯事,影響咗之後。」

「妳冇必要自責。正如頭先 Vincent 都講過,呢啲只係經歷。其實,妳應該多啲同 Vincent 分享,妳生活先冇咁大壓力。」

「我覺得過去冇必要提……」

「如果真係完全過去,當然冇必要提啦!不過,如果過去對妳仲有心理壓力的話,就應該諗辦法去面對或者解決佢。而且,只要妳肯向信任嘅人分享,就自然減輕咗壓力。」

「我以為呢啲事……唔係男人可以接受。」

「以醫生嘅角度,我只會建議妳自行搵信得過人。」Doctor Liu 瞄了 Vincent 一眼,續說:「作為朋友,我可以保證呢個男人信得過。」

 

******

柏原太賀:兩個天堂(十九 - 完結篇)

在完成預約後,Vincent 便牽著婉婷的手離開。直到上了私家車後,婉婷已安心了不少,但仍有不少問號。在回家的路上,她還是禁不住問 Vincent 有關他跟耀達的事。

「你同耀達識咗之後,你哋兩個就一直聯絡?」婉婷問。

「原本冇打算,我只係想知道更多關於妳嘅過去。其實,我怕佢以前曾經對妳家暴之類,令妳有心理陰影。有啲嘢,可能妳冇同外母講嘛。但係,當知道原來只係咁普通嘅事,就打算不了了之。」

「後來呢?」

「係佢主動約我見面,話要多謝我喎。」

「吓?多謝你啲咩呀?」

「原來咁多年嚟,佢都一直覺得對妳唔住,所以唔敢再拍拖。佢話如果唔係我搵佢,佢都唔知妳已經結咗婚。而家,佢終於可以放低個心理包袱。」

「即係佢對我仲有嘢喎。」放鬆了不少的婉婷,也開始蠱惑起來。「你唔會唔鍾意咩?」

「我覺得對佢嚟講,妳係一個心理陰影多啲囉。哈哈!」面對婉的挑撥,Vincent 也不甘示弱:「而且,有人鍾意自己老婆,只係證明我先係勝利者。」

「自大狂!」

「不過,我都要多謝番佢。上次我返大陸公幹,妳又走咗去咁危險嘅地方。我怕妳出事,又唔敢叫外母老人家幫手。而且,我諗妳都唔想其他熟人知妳思覺失調呢件事,就叫耀達幫手搵妳。」

「等等先!你點知我會有危險呀?」

「拎妳電話嚟。Please!」

紅燈剛好亮起。婉婷遞了自己電話給 Vincent 後,三幾下動作便打開了一個隱藏的追蹤定位 app,再按下 deactivate。

「你一直 check 住我行蹤?」

「情非得已。當日,怕妳突然喺街度發作,所以為安全起見先裝。如果唔係,我又點可能知妳喺示威區,立即叫耀達過去幫手呢?」

婉婷立即晴天霹靂,原來這段誤以為是天意的浪漫重遇舊情人日子,竟然是自己丈夫的把戲。對了!回想當晚,在那種混亂的狀況下,要不是刻意找尋目標,又怎可能留意到跟自己擦身而過的人呢?周婉婷呀!周婉婷!妳是多麼的天真浪漫,還有多麼的幼稚冇腦呀!

原本跟暗中跟蹤的婉婷應該憤怒的,但 Vincent 明顯是善意,而且她也突然被心虛佔據了情緒。

「即係你知我上過佢屋企?」

「嗯。」

「你真係唔驚咩?話晒我哋兩個以前曾經……」

「我信得過佢。」Vincent 以肯定的話氣搶話:「同佢傾過,當日佢係真心愛過妳,而且到今日都仲懊悔緊。一個負責任嘅男人,係唔會做啲令曾經愛過嘅女人後悔嘅舉動。而且,佢幫番我哋,對佢地講都係一種釋懷。」

婉婷回想當日曾經意圖引誘耀達,再想到兩個男人如此深愛自己,還有自己一時意氣就跟陌生人去了酒店開房,不由得鼻頭一酸。

「對唔住,老公。」

「妳冇嘢對我唔住,妳只係病咗而自己唔知啫。」

「但係……我……有一晚唔返屋企……」

「唔返屋企一晚,唔算係咩。我有問耀達知唔知妳果晚點解去咗酒店,佢同我講咗。」

「佢?佢講咩?」

「佢話妳有一晚太激動,以為我喺大陸同人鬼混緊,唔想返屋企。佢又唔方便留妳喺佢度,所以就幫妳 book 咗酒店。」

柏原太賀:《兩個天堂》(十一)

那一晚,大概是耀達向 Vincent 撒下一個善意的謊言。既然說穿了也於事無補,她只有內疚地接受耀達的苦心,讓那一件糊塗事成為一輩子的秘密。

「係喎!」婉婷突然想到一件事。「阿媽點會有耀達嘅聯絡?」

「呢個正正係我信佢嘅原因。」Vincent 報以一個意味深長的笑容。「雖然唔甘心,但都要認。如果係我,我都未必會做得到。」

「係咩呀?」

「妳仲記得大學 final year 前,妳阿爸失業嗎?」

「記得。阿媽同你講。」

「嗯。當時,妳其實冇錢交學費。係有人登門話要賠罪,妳阿媽怕妳再受傷,所以冇話妳知。但係佢隨口講過妳就快連書都冇得讀,之後幾日就有一筆錢放咗去妳信箱。過咗幾年,外母曾經喺街撞到佢,就問佢當日嘅事,呢個男人只係答『唔記得』。外母心水清,但妳當時已經有拍拖,就只係問佢拎咗電話,話日後再約佢飲茶。」

「冇可能係佢……佢明明好窮。」

「一個男人只要咬實牙關,係可以好得人驚。否則,佢都唔會由一間就快清盤嘅公司,做到今日嘅規模啦!」

婉婷沉默。她以為自己一輩子都在行衰運,卻原來她一直也被守護着,而且還不只一個人。如果有前世今生的話,這大概是上輩子救了萬人種下的福氣吧!

「你好似好欣賞佢咁喎。」

「作為男人,係。但作為妳老公……」

「唔好唔開心啦!我同佢冇嘢。」

「我係想講,我欣賞自己老婆嘅眼光啫。哈哈!話晒,我係妳最後選嘅人。」

望着開懷大笑的 Vincent,婉婷為遇上這個男人而感恩。雖然車窗外的香港,已經不再閃耀昔日的光彩,但她終於明白美好的人和事一直存在着,只是自己有否察覺,讓內心能寬懷。

即使在逆境,只要懂珍惜,原來天堂一直都在。

柏原太賀:兩個天堂(十九 - 完結篇)

~~~完~~~
重溫:

兩個天堂(全十九集)

愛上不存在的妳(全十六集)

靈玲(全八集)

野.火(全十集)

前度暫存迷你倉(全兩集)

如果Double May有特異功能(全十五集)

 

facebook:

https://www.facebook.com/Kashiwabara30

更多相關文章:

隼人:愛在瘟疫蔓延時

世界上最遙遠的距離 黃任匡醫生與太太不同枱食飯感觸

周靈山:仍然有太多人活在過去


Follow she.com on Facebook & Instagram