《條路自己揀,畀人飛唔好問點解》

最近有個女性朋友同我講:「自問我都係好人一個,每次拍拖都真心付出,點解都係無好結果?」然後我望住呢個女仔,諗番起佢每次認真付出嘅愛情:有老婆嘅男人,落酒吧識一晚就一齊嘅男人,最近嗰個係一個Playboy富二代。

我真係好想問番佢轉頭:其實你期待要咩好結果?個老公為你拋妻棄子?酒吧男同你一見鍾情白頭到老?定係無腳雀仔都為你停低?

雖說,同個正正常常身家清白嘅男人一齊都未必有好結果。但係,你同個咁複離背景或者擺明係玩玩下嘅人一齊,你Day1就應該做好心理準備啦嘛?條路自己揀呀⋯⋯

好多女仔成日怨點解緣份唔眷顧下自己,點解自己每次都係悲劇女主角,點解自己遇唔到一個好男人,又喺度妒忌其他平凡嘅恩愛情侶。 明知山有虎偏向虎山行,然後畀老虎咬就問點解?唔好傻啦。問個天點解?不如你自己問下自己。

咁大個人就應該對自己嘅選擇同決定負責,唔可以再賴自己年少無知,唔知道結果係咁,或者賴緣份捉弄你。你選擇同得一個唔可靠嘅人一齊就應該知道自己有損手離場嘅風險。你無辦法選擇去愛上一個人,但係你總有能力去選擇要同個咩人一齊,所有嘢係自己揀,唔係緣份拎枝槍指住你去say yes。