森美專欄:女人額頭要貼 Fragile 貼紙


男人對女人嘅要求主要有兩大方向,一係典型賢良淑德嘅黃花閨女,另一就係可以分享嗜好嘅好知己,但要想呢兩種優點能夠集於一身可以話冇可能,一個黃花閨女又點會分享到男人嘅嗜好?

呢種女仔只會喺屋企用電髮夾夾頭髮、戴大眼仔同黐假眼睫毛,呢個裝扮嘅女人一定唔會同男人去行山以容讓紫外光喺佢面上留痕。相反,會一齊打機同睇波嘅女仔就一定唔會千衣百順、嗲聲嗲氣咁同男人講好掛住你!


要滿足一個男人當然最好係做哂兩邊,但若然唔能夠,而你已經做咗愛人嘅身份,咁就不如畀你男人搵番個知己啦!

只要你識扮弱者,令佢覺得你要受保護,你經唔起情傷,你額頭長時間貼住Fragile貼紙,咁就算佢出面有知己,但當佢要喺你地兩個中間選擇嘅時候,你嘅Fragile貼紙都會令佢諗:「只有tough嘅女人先可以冇咗佢都生存到,但你係脆弱嘅小女孩,你冇咗佢就唔可以生存落去!」呢種近乎自大嘅責任感係會將佢留喺你身邊,所以只要繼續做小女孩就可以一直箍住你男人。


不過而家啲女人愈嚟愈中性,愈嚟愈強,要以女強人自居嘅女性接受呢個做法確實好難。但係只要你能認清事實,就會明白雖然你生活上唔需要佢支持,但喺愛情上略施小計扮弱者,用計謀保住愛情,都算係強者嘅表現!

 

作者Profile:

森美


DJ、金牌司儀、棟篤笑講者、製作公司老闆、專欄作家,他不放過任何渠道,誓要透過不同身份、不同平台發揮源源創意。



Related Articles


More from Cosmopolitan