沒那麼愛了?別說定,先問自己五條問題

好集慣

有又煩,冇又煩,在乎有更煩定無更煩。計我話,最難一定係相愛過後、相處了一段日子,竟發現對方的真面目非自己所料而漸漸頂唔住之時。「你以前明明唔係咁架!」「其實我一直都係咁。」跟期望有出入,絕對絕對唔等於呢個人不值得你繼續愛!唔需要即刻斬欖!老老豆豆,有哪段關係唔需要磨合?有哪個人不需要改變自己遷就對方?問問自己,你愛她嗎?愛!咁,不如再問自己多五條問題,包保你每天愛她/他多一些。

問自己問題,因為你要學識感激!

 

1 / 嫌他/她沒你期望的性格和優點嗎?
問問自己,如果佢真係有你想要嘅優點,又如何?會唔會有downside先!會唔會其實更不是你想要的人先!如,你好想要個上進男友,但佢就偏偏隨遇而安,享受生活多過積極創業,你好不忿,好想埋怨。但真係問心,如果佢變成極級上進,佢個性格會點先?會唔會好霸道?會沒有時間陪你同你食飯同你睇戲?佢變成工作狂,你日日在家等佢收工,講唔到兩句佢就攰到即刻要瞓覺,第二朝晨咁早又唔見咗人……可能係極端咗,但這是提醒你回想自己點解會愛上呢個人,你要的上進,都會有反效果。

2 / 你期望的優點沒有了,但佢有沒有俾到驚喜你?
可能是你從沒想像過的特質,其實令你們的關係更快樂了?譬如你想要一個收入好穩定,情緒好穩定,好成熟又好聰明又好賢淑的女友,(大佬,邊有咁大隻蛤乸隨街跳?)但她通通不是,不過!可能她同屋企人關係很好,她是一個很有藝術氣質的女子,她會帶你去認識畫家音樂家,她可能影相極有品味。別左顧右盼,望望你眼前的她其實已有著她本來的極多優點,正在帶給你驚喜!

再問,發掘他之餘,其實也是發掘自己更多……

 

3 / 再問!情人的怪脾氣和性格,有沒有令你學習更多?
令你開發了自己的可能性?譬如,他是一個唔鍾意早起,永遠講咗Plan A但第二醒來便會提議Plan B的人?咁,會唔會就係你學習令自己人生更加flexible的時候?或許是你太多planning,或許是你太一成不變?不是必然。但這都是令你自己反思自己,繼而再欣賞身邊人竟然有著如此不一樣性格,並可以讓你發現人生並不一定係你想像中咁的。他的古怪,他的「缺點」只係你講嘅啫,換個角度,你又可以發現更多。

4 / 問吓自己,佢幾時老點過你先!
情人通常會在你需要的時候給你意見,未必幫到你做決定,但以佢眼中的你,會同你自己眼中的自己不同,所以有時係會比你更了解自己,給予到一些可行建議,讓你再次發現生命更多,甚至做咗一個啱決定。如,你有時候極唔想去一啲social event,某某公關活動唔想去,多年無見朋友聚會唔想去,但情人可能會建議你去吓識吓人,開心吓,嗰一刻你覺得佢唔替你設想,但過後諗番,其實個event又去得幾開心喎,又或者真係識多咗人喎,幫到工作喎。所以,有時要問吓自己,你的愛人幾時有點過你先,係咪分分鐘成日幫你做啱咗決定先!還不值得更感激?

5 / 最後,問條關鍵的,你有沒有對情人為你做的好微細事情作出感激呢?

一段關係愈行得耐,愈take it for granted,你執著佢無為你做啲乜,佢無為你改變啲乜,但日常裡佢常常為你做的事,你卻忽略了,唔俾credit佢。可能只係你件恤衫佢幫手燙一燙,你食完杯麵懶得丟佢幫你做咗,係好微細,但都係好重要。這些事情,除咗呢個世上最愛你的老豆老母,無人會為你做架喇。遇到咁嘅人,還不珍惜?

最後最後,愛情要行落去,除咗一味愛,一味激情,仲要互相感激和欣賞,時刻記住佢對你的好,每天愛對方多一些,都來自一份感恩之心。

撰文:恆
圖片:Unsplash