淨係識send「我愛你」? 8個sweet爆短訊令伴侶驚喜窩心

Cosmopolitan.com.hk

一對情侶一齊得愈耐,二人間嘅小互動就會愈嚟愈似例行公事,除咗出街拍拖會變得hea之外,send message都唔例外!成日聽到女仔投訴男仔「hea覆」甚至「已讀不回」或者男仔投訴女仔「淨係識覆emoji」,究竟點樣先可以喺短訊間增加熱情同驚喜?不如試吓send呢啲,包佢收到嘅時候會sweet爆:

「我等埋你先瞓」

▲ Cosmopolitan.com.hk

就算唔係同一張床,但等埋對方先瞓覺呢個舉動超窩心!可能另一半係出咗街未返屋企,又或者加班遲咗放工,願意等埋佢先一齊入睡可以展示到你對佢嘅擔心同著緊。再sweet啲嘅可以加多句「希望有一日可以唔洗再隔住個電話同你講。」

 

「其實食咩都無所謂,最緊要係同你食」

▲ Cosmopolitan.com.hk

「喂喂今晚食咩呀?」相信呢個係唔少情侶嘅日常對話,不妨下次回覆嘅時候試吓咁樣覆啦。講真呀,無論係啱啱一齊定係一齊咗好耐,食咩其實都唔係重點,重點係想見吓你!

 

「做緊咩呀你?」

▲ Cosmopolitan.com.hk

其實收到對方突如其來嘅一句「做緊咩呀你?」都幾sweet㗎,因為你會知對方唔係「有事鐘無艷」,佢係真心關心你所以對你嘅生活日常感興趣。所以下次無topic講咪問吓對方做緊咩嚕。

 

「我覺得你好叻」

▲ Cosmopolitan.com.hk

讚美係好重要!呢度講嘅讚美唔係指好膚淺嘅「你好靚」或者「你好型」,而係打從心底裏欣賞對方嘅讚美。例如對方成功完成咗某啲目標,或者做咗啲令你另眼相看嘅嘢,你對佢嘅欣賞同仰慕記住都要講出口!

「知唔知點解今日會落雨?因為你都唔喺度」

▲ Cosmopolitan.com.hk

撩妹金句唔好以為淨係男仔講先work,女仔同男仔講一樣好sweet!雖然好肉麻好嗲,但係情侶就係最鍾意聽呢啲呀嘛。小編喺度就比多個idea大家:

「我今日偷咗啲嘢?」

「咩呀?」

「我偷偷想你了!」

 

「好多謝你無論發生咩事都喺我身邊」

▲ Cosmopolitan.com.hk

面對面講感謝嘅說話或者好尷尬好難以啟齒,咁不如喺message講!向對方表示感謝喺一段感情入面其實都好重要,好好多謝佢為你做嘅一切,或者佢從來不求回報,因為愛你先會主動做,但你對佢嘅感謝可以比佢知佢並唔係單方面付出,而佢為你做嘅嘢你都知道。

「最幸福嘅事除咗可以食到好味嘅食物之外,就係瞓醒見到你喺我身邊」

▲ Cosmopolitan.com.hk

希望有一日「我」會變成「我們」,有咩sweet得個每朝起身你會喺身邊?但係就咁講又好似好假咁,所以前面可以加返句「最幸福嘅事除咗....」自行填入啦!

 

「希望之後每一個生日都可以同你過」

▲ Cosmopolitan.com.hk

呢一句可以比對方知道你希望未來都會有對方嘅陪伴,絕對唔係玩玩吓!「生日」可以自由填入唔同節日好似「聖誕節」、「情人節」甚至「紀念日」。

 

推薦閱讀:

男生最討厭做作女!想受男生歡迎就不要做這5件事

你會是好老婆嗎?如何令男友覺得你娶得過

12星座愛情配對攻略!金牛女 x 處女男最兩情相悅?



Follow us on:

  • Facebook: CosmoHK
  • Instagram: @cosmopolitan_hk
  • YouTube: CosmopolitanHK