港女講日:勁簡單!每位日本靚女起身必做嘅5件事

係女仔都想人讚靚架啦,睇完日本網站《美BEAUTÉ》教大家朝早起身做呢5件事,原來變靚可以好似呼吸咁簡單!唔好再葡萄人哋生得靚皮膚好身材又fit,信我,你都可以做得到!

1. 開窗

唔理天氣幾凍幾熱,朝早起身一定要拉開窗簾打開窗,等陽光同埋空氣走入你間房!接觸到陽光先可以叫醒生理時鐘,令身體及頭腦清醒,就算幾早起身都可以精神飽滿。

2. 日頭做運動

做運動嘅女仔越來越多,不過大部分都怕囇黑揀夜晚先做,其實識做運動一定係朝早做,運動可以增強腎上腺素等興奮物質分泌,令你全日都好有精神,太夜做劇烈運動會令身體過度興奮瞓唔著,皮膚自然差,得不償失!就算起身冇時間做流汗運動,起碼都要係床上做吓伸展先好落床。

3. 早餐前飲暖水

起身刷完牙第一件事係空肚飲暖水,除咗可以補充瞓覺時流失嘅水分,仲可以提醒腸胃要起身做嘢,防止便秘同埋幫助早餐消化。

4. 食早餐

就算你減緊肥都一定要食早餐!朝早食生果營養最易被吸收,另外飯或者其他碳水化合物就可以補充能量,個人精神咗,望落自然靚啦!

5. 面部按摩

好多女人起身都會水腫變包包面,雙眼皮腫到變左單眼皮等,真心想喊!其實化妝前簡單按摩吓耳仔、鎖骨及腋下等淋巴位置幾分鐘,就可以輕鬆去水腫。

ig@maria_addict