港女講日:唔使節食!日本3大懶人減肥法

日本女團AKB48前成員、19歲嘅西野未姬一直發展平平,前年仲被爆深夜密會尊尼仔,最終於去年離隊。雖然西野繼續留喺藝能界發展,但工作機會唔多,要到燒肉店兼職維生,身形走晒樣,雙下巴、巨腩現哂形!

最近西野應電視節目邀請,挑戰為期兩個月嘅瘦身企劃,開始時體重逾117磅,靠每週運動3次、禁食最愛嘅甜品,兩個月後成功減18磅,體重回落至98磅,腰圍更加減逾7吋,唔少網友紛紛請教其收身秘笈!

節食、做運動,雖然有效果,但過程辛苦到喊,唔係個個女仔堅持得到,又懶又想減肥?即睇以下3個日本大熱減肥方法:

1. 8字減肥法 懶人指數***

由日本減重訓練及阿根廷探戈舞導師近藤學研發,只要透過扭動骨盆畫「8」字,就可以令腰圍變細,練成纖腰,有日本女星成功一星期內腰圍瘦8cm!方法好簡單,將雙腳分開至肩膀闊,微微外八站立,再利用腰部力量扭動骨盆畫「8」字;一邊諗住「8」字路線,一邊依照「左前、左後、右前、右後」順序扭動骨盆。每日做8組,完成1個「8」字為1下,每8下為1組,大概10分鐘就可完成。注意畫「8」字時身體要慢慢扭動,先至可以運用到深層肌肉,有效燃燒脂肪。

2. Zero Training 懶人指數****

由41歲美魔女減肥達人石村友見研創,單靠呼吸就可以瘦身!石村解釋,隨年齡增加,人體肌肉及關節會慢慢萎縮,「Zero Training」可以令肌肉及關節重回本來位置。首先利用毛巾及書本搭成一個平台將頭部墊起,口訣係「3秒吸氣、7秒呼氣」,只係靠呼吸,就可以令肋骨伸展,特別對收縮咗嘅背部及腰部有幫助。注意一邊呼吸,一邊要對肌肉有意識,呼氣呼到冇得再呼,就要咳幾下,你會feel到肌肉變硬,咁就做啱喇!5分鐘減2吋腰,坐定定都可以瘦到!

3. 西柚減肥法 懶人指數*****

食西柚減肥?我都識啦!錯!唔係叫你食,係叫你擺!唔係講笑、唔係呃人!大阪大學同埋新潟大學進行共同研究證實,放西柚在身邊,即有減肥作用,因為西柚中Limonene(檸烯)香味成分有效抑制食慾,幫助燃燒脂肪,懶到出汁嘅女士們,仲唔快啲飛去買西柚!

圖片來源:twitter.com@mikinishino4