港女講日:忍無可忍!日本女生最憎聽到男友遲到嘅4大藉口

遲到唔一定係女人死症,男人一樣可以係遲到大王!約咗女友大人遲大到已經罪不可恕,仲要解釋嚟掩飾的話,真係冇人救到你!日本網媒Menjoy!集合以下幾個女人最唔接受嘅遲到理由,男士們就算遲到都唔好解釋咁牽強喇,一係企定定受罰,一係嗱嗱聲晒冧算吧啦!

1.太攰瞓著咗

26歲女OL:「約咗男友老地方見面,但佢一直冇出現,我就繼續原地等,打好多次畀佢都唔通,等多一個鐘好嬲咁自己返屋企!夜晚先收到佢短訊話瞓著咗,我好忟打畀佢同佢講因為你我冇咗寶貴嘅一日,點知佢仲要發我脾氣,好大聲咁話太攰瞓著咗都冇計!都唔只一次喇,我最後都忍唔住飛咗佢!」

2.扮靚遲出門

25歲女OL:「遲咗30分鐘嘅男友解釋,係因為想我開心而悉心打扮,結果就遲到。呢啲藉口聽到就火滾,仲話要我開心,扮靚緊要定準時緊要呀?」

3.妳遲我又遲

21歳女學生:「有位男性朋友次次都起碼15分鐘,我忍唔住爆出嚟,點知佢解釋以為我會遲,所以先就我一齊遲,我試過遲到一次啫,駛唔駛咁小器呀!」

4.遲咗少少啫

25歳女IT人:「有次放工喺車站等男友,足足等咗半粒鐘,心情已經好差,佢見到我黑哂面仲火上加油,話自己只係遲咗半!粒!鐘!啫,小小事都嬲……咁都叫小事?我真係嬲到痴咗線!」

圖片來源:https://www.pakutaso.com