港女講日:最怕播成長片段?日本後生女普遍唔想擺酒

最近日本有個新車胎廣告,請到可愛又靚女、仲攞過世界冠軍嘅單輪車選手佐藤彩香做女主角,著住婚紗踩單輪車趕去婚禮會場,而新郎就好型咁揸跑車飄移現身,型盡全場!

仲以為搞一個難忘婚禮,係唔少女人畢生願望,點知最近婚禮場地情報網站「みんなのウェディング」訪問300幾位冇擺酒嘅2字頭及3字頭已婚女性,發現好多後生女唔想搞婚禮之餘,亦唔想出席人哋婚禮!

出席婚禮經驗方面,20-25歲受訪者之中差唔多有一半(43.5%)係完全冇去過,亦表示唔鍾意參加人哋婚禮,如果係唔熟朋友請飲,超過9成都表示唔會去。

女人口是心非係常識吧,雖然受訪者結婚時冇搞婚禮,但問到佢哋有冇覺得遺憾,有41.1%話如果有機會都想搞一次,40.5%覺得影輯婚紗相做紀念都好、34.4%希望著一次婚紗、30.2%想父母見到自己出嫁個樣。至於婚禮形式,最多人想簡簡單單用婚攝留住最美一刻,其次係搞證婚酒會,至於最煩最多儀式嘅飲宴,超過7成女人say no!

最後就係婚禮節目,最多人感興趣係與家人步入會場,其次係送花及紀念品畀父母,同埋與來賓合照等,最反感反而係向父母講勁大段感謝說話,仲有播成長片段!咦,香港人擺酒,呢兩樣令日本妹討厭節目嘅,反而係must have!

圖片來源: Toyo Tire & Rubber Co., Ltd