港女講日:邋遢有運行!日主婦疑患癌上節目被眼利觀眾提醒

人生好多嘢永遠係無法預料!好似日本一名42歲家庭主婦智子,因言行舉止太過污糟邋遢,被女兒強逼上綜藝節目接受改造,估唔到竟然被眼利觀眾發現疑似生cancer,當事人經檢查後確診患癌並已接受治療!

日本綜藝節目「大阪ほんわかテレビ」有個單元專門幫唔識忙打扮嘅人進行全身大改造,今年3月有一位21歲女性來信抱怨媽媽穿著、化妝都非常hea,甚至成日飲完酒返屋企就喺玄關瞓覺,仲「大叔」自己老豆!

智子經節目改造後,成功由肥師奶變成美魔女!!不過呢個唔係重點,節目3月播出後,電視台收到一封觀眾匿名信,話覺得智子條頸望落怪怪哋,疑似甲狀腺腫大,建議智子即刻去做檢查。

節目將信中內容轉告智子,佢即刻去body check,發現甲狀腺真係有問題,頸入面有多個腫瘤,仲要唔知良性定惡性,需要動手術切除再加以分析,萬一係惡性好有可能會轉移到全身!

到今年9月,智子已從手術復原,而腫瘤分析結果確定係「濾泡癌」,屬惡性腫瘤,好在發現得早,切除後冇發現轉移跡象,醫生認為暫時唔駛進一步治療,只要定期覆診觀察就得。

節目播出後,唔少網友都大讚嗰位匿名觀眾眼力太好,同時多得工作人員轉達來信,加上智子冇諱疾忌醫,真係好聽話去醫院檢查,令到智子執返條命仔!

其實2016年亦有類似事情發生喺澳洲游泳名將霍爾頓身上,佢嘅隊醫收到粉絲來信,話從比賽轉播發現霍爾頓胸前粒痣好奇怪,建議佢深入檢查,後來發現原來係皮膚癌,霍爾頓事後仲喺IG感謝粉絲來信呢!

圖片來源:電視截圖