港女講日:塑造好女友形象! 5個「男性受落」穿搭貼士

早前日本網站《女子SPA!》刊登一篇讀者投稿,係一位32歳人妻嘅自白,佢以前係一位鍾情109辣妹打扮,因為對書店店長一見鍾情,決定轉變誇張形象,換上一頭黑直髮同埋男性受落(男ウケ)打扮,扮純情埋店長身,好快將店長私有,兩年後仲結埋婚!

不過,呢位人妻體內依然流住辣妹嘅血,佢根本唔鍾意乖乖女打扮,為咗令自己心理平衡,佢呃老公話係同舊同學食飯,其實每個月都會搵一日去朋友屋企大變身,然後去飲酒,做返真正嘅自己!

人妻臨走前會換好衫,散哂一身酒氣先返屋企。點知有次飲到貓哂,就咁以一身性感衣著搭的士返屋企,老公當然超驚訝,正當辣妹煩緊要點解釋時,老公拎張卡片佢睇,原來佢以前係「辣妹俱樂部」常客,超鍾意女生作辣妹打扮!自此之後,人妻唔駛再帶住假面具做人,可以自由穿著心愛服裝!

上文提到「男ウケ」打扮,即係受男性喜歡及歡迎嘅打扮,坦白講男人第一眼望你樣同埋身材,其次就係睇你衣著打扮。要塑造出男士心目中理想嘅girlfriendable穿搭,不妨參考以下穿搭貼士:

1. 襯衫+迷你短裙

印花圖案襯衫配搭迷你短裙,原來係唔少男士最喜歡嘅女生穿搭,簡單嘅配搭就輕易展現女生優雅又具氣質嘅一面。

2. 吊帶裙+T-shirt

根據非正式統計,男生最喜歡女生著裙,覺得著一條連身裙太過單調,可以吊帶裙內搭T-shirt,帶出甜美休閒氣息,同時增加造型層次感。

3. 中長裙+貼身上衣

中長裙在走路時隨風擺動,當著起高踭跟鞋時微微露出腳踝線條,格外優雅迷人,配搭簡單貼身上衣,突顯上身迷人曲線,令男生目光難以從你身上離開。

4. 露膊衫+A字裙

大部分男生都唔想另一半著得太性感,所以女生只要露少少就夠,可以揀露肩上衣,微微展露出肩頸及鎖骨線條,若隱若現嘅性感,最能提升佢對你嘅好感度。

5. 全白穿搭

純白色服飾除咗令肌膚更白皙,同時亦散發仙氣,隨時隨地融化男人個心。

圖片來源: http://motenavi.doorblog.jp