港女講日:斷捨離!5種衣服應該立即從衣櫃裡清理

爆紅混血模特兒滝沢カレン,以奇怪日語「趣味在宅」、「俺松本潤」等幫名人改嘅四字成語名成功引起觀眾關注,早前出席午間清談節目《メレンゲの気持ち》時分享自己換季習慣,表示「每半年就會清一次衣櫃,唔要嘅衫會送畀朋友或扔掉,冬天衣櫃唔會有春夏服裝。」

紅咗果然就係任性,每半年就可以買一堆新衫!滝沢就解釋,每季清衣櫃係因為自己係專業model,好應該著當季最新最潮服飾,所以唔敢著過季衫。諗諗吓,發覺自己勁耐冇執過衣櫃,有一大堆衫唔著但又唔捨得掉,所以其實我都幾欣賞滝沢呢種定期換衣櫃嘅習慣,某程度都係斷捨離嘅實踐!

不如一齊學識點樣斷捨離,以下5種衣服無慮即掉:

1. 有紀念意義嘅衫

校服、校隊運動衫、活動紀念tee…你可能覺得呢堆衫好有紀念價值,就算已經變黃起毛粒都唔想掉。與其保留呢種一世唔會再著嘅衣服,不如幫佢影張相,都係另一種形式嘅懷念。

2. 唔啱身擺咗n年嘅衫

有啲人會保留以前較瘦時期嘅衫,幻想自己終有一日會瘦返再著,結果一擺就擺幾年原封不動!與其等自己瘦返,不如唔好再買一啲會隨身形改變而好易著唔落嘅衫仲好啦。

3. 宴會服

女生們衣櫃總有幾件去飲衫,可能係露肩裝,又或者質料閃令令勁浮誇,平時冇機會著,又或者根本唔會著兩次。咁不如將佢哋出售,下次以租代替買。

4. 邋遢衣服

茶漬、發霉、泛黃、起毛粒、甩色、有異味…呢啲衫邋遢又寒酸,連喺屋企都唔會著啦,一係當抹布,一係掉咗去,唔好擺喺衣櫃浪費空間。

5. 落伍衣物

好多女生都會跟潮流,但係潮流實在係轉得太快! 買埋一堆唔再興嘅衫,雖然新淨,但深知再著就會顯得太out,咁係時候掉喇。

圖片來源: ig@takizawakarenofficial