港女講日:日本女生流傳 暖水排毒法1個月減3公斤

日本人習慣飲冰水,遇著唔方便日子去日本旅行都幾頭痛,在外想飲杯暖水都唔係易事…

最近日本綜藝節目「行列のできる法律相談所」講起「冰水」呢個話題,松子DELUXE提起佢喺便利店遇上嘅一件事,話說有兩位女生買樽裝水,女生A問女生B:「奇怪,你唔買冰水?」,B答:「飲常溫水比較好呀,model都係飲常溫水架!」松子DELUXE聽到呢段對話後非常不屑,仲晦氣話「買常溫水嘅人都係醜女!」

點知在場嘅女主播德島繪理香唱反調:「喺餐廳我都要求走冰,靚女都唔飲凍嘢,雜誌係咁講…」搞到松子DELUXE更加燥底,反駁問「所以睇雜誌就會變靚女?」

呢個話題立即引發好多網友議論,我唔知飲咩溫度嘅水同埋外貌係咪有關係,但係同體重就一定有關!日本養生排毒專家蓮村誠提倡「溫開水奇效排毒法」,建議朝早起身後飲用暖水,可以促進體內代謝,令毒素更易排出體外。用餐後30分鐘,慢慢飲100毫升暖水,飯後休息10分鐘,然後散步20分鐘助消化,加速燃燒脂肪及毒素排出,可以提升減重效果。

留意飲暖水目的係保持消化力,淨化毒素,幫助減肥,並唔係靠飲水唔進食餓瘦自己。想試下飲暖水keep fit有以下幾點要留意:

1.細細啖慢慢飲,唔好一口氣灌落去,一下子飲大量水分,會造成身體負擔,尤其用餐前後,避免灌下大量暖水。

2.朝早起身就飲一杯150毫升左右暖水,用5-10分鐘慢慢飲溫暖腸胃,促進整體代謝及排泄。

3.早午晚一日三餐時飲用,每次150毫升,邊食邊慢慢飲。建議重覆一啖飯一啖水,幫助消化。

4.三餐中間,每隔20-30分鐘飲一兩啖,溫暖腸胃,提升消化力,一旦消化力變好,改成朝早起身一杯、用餐時慢慢飲就夠。

寒底、氣血不足之女性要多飲暖水,避免飲食生冷食品以損傷脾胃,令寒氣塞住相關筋絡影響氣血循環,日積月累引致肥胖。大多數人開始「溫開水奇效排毒法」一個月後,體重大約下降2-3公斤。此外,餐前飲暖水會有飽足感,食量自然減少。

圖片來源:www.pakutaso.com