港女講日:日模丟架被人鬧仲唔知! 睇演唱會被人反白眼之4個行為

現代人自拍成癮,行街、食飯、睇戲自拍都唔夠,連睇演唱會都唔放過!最近日本就有單因為自拍而丟架丟出國際嘅事件…

早前美國天王Bruno Mars於日本埼玉縣舉行演唱會,發生咗一件不快事,話說日本𡃁模野崎萌香與友人有幸企近舞台位置,點知萌香並冇專心欣賞,而係掛住自拍,背對舞台與友人齊齊selfie,至少拍咗15條IG Stories,搞到Bruno超激氣,嬲到喺台上拎起條毛巾掟落台下,叫萌香唔好再影,慘在佢仲誤以為偶像送禮畀佢,錄低擺上IG Stories以為好威,惹來網民圍插,批評萌香係「日本國恥」,搞到萌香要閂咗留言功能,真係攞嚟衰!

去親睇演唱會都係想支持偶像,點知居然令偶像扯火,萌香真係叻叻豬!唔想睇演唱會時被人反白眼,就要留意以下幾點演唱會禮儀啦!

1.避免自拍及錄影

野崎萌香就係一個反面教材。身為表演者,當然希望觀眾全程投入享受傑嘅演出,而作為觀眾,應該尊重表演者,而唔係將專注力放喺手機。享受現場氣氛先係最緊要,如果你淨係掛住影相同埋錄影,你係咪想擺上網呃like咋?

2.閂電話、電話變震機

明明使咗幾百蚊買張飛,點解唔好好哋專心欣賞表演者嘅演出,硬係要拎個電話出嚟㩒?有時快睇一下都算,但有啲人會不斷上Fb、打機甚至煲電話粥!另一樣就係記得較靜音,不停聽到你啲叮叮msg聲,真係好騷擾囉!

3.唔好阻礙後排視線

好多人覺得喺香港睇演唱會氣氛差啲,個個一碌木唔識起身一齊嗌,不過個人覺得除非係搖滾區企位,否則應企時先企,先算不失禮儀。螢光捧、紙牌等應援物亦唔應該長期揮舉過高,遮擋後排觀眾視線。

4.唔好大聲喧譁

同偶像大合唱當然high,但唔好肆意大聲喧譁尖叫,嘈到拆天,大佬,我畀幾百蚊係聽偶像唱唔係聽你唱呀!

圖片來源:twitter@moeka_nozaki