港女講日:真素顏美人! 跟日本女星養成5大護膚好習慣

自從藝人個人IG興起,見到女星們素顏樣都唔係咩稀奇事,最近日本化妝品公司CLUB COSMETICS針對「素顏」攸調查,主題係「素顏都好正嘅藝人排行榜」,由500位20代-30代男女票選,唔知素顏女神頭5位又是係邊幾位日本女星呢?

第5位 深田恭子(9.0%)

第4位 石原聰美(9.4%)

第3位 北川景子(11.6%)

第2位 新垣結衣(20.6%)

第1位 佐佐木希(25.6%)

雖然結衣BB係上榜女星中唯一冇公開過素顏樣,但見佢平時淡妝都咁正,素顏都唔會差好遠,至於力壓結衣BB嘅就係日本最受歡迎女星佐佐木希,唔單只個人IG經常以素顏居家look示人,亦曾經於公開活動中素顏上場,都算係上榜女星中最常show off素顏嘅一位。

5位都係一致公認嘅大美人,皮膚又白又有彈性,除咗天生麗質,日常護理都好緊要,一齊養成5個天生好膚質嘅護膚習慣吧!

1.去角質

肌膚有過多老死細胞堆積,新生細胞就出唔到來,令肌膚唔夠透亮。唔好發現自己膚色暗黃就狂搽美白產品,應該要先去角質,不過敏感肌及痘痘肌就要盡量避免去角質,以免令皮膚更敏感受損。

2.勤用眼霜

素顏look好易被黑眼圈、細紋、眼袋敗壞,所以必須加倍修護眼周肌膚,眼霜唔慳得,分點式塗於眼周,用指腹或者按摩棒以畫圈式往上抹開,力道要輕要慢,以免眼周敏感肌膚受到拉扯。

3.補水鎖水

想要水嫩肌膚,離不開補水,畀肌膚補水最快方法係敷面膜,敷完再搽cream鎖水。

4.運動

世上冇醜女人,只有懶女人,運動可以幫肌膚排毒,令肌膚更細膩光滑,你都見好多運動女生都係素顏女神。

5.注重飲食

好膚質要內外兼修,就算護膚程序做足,都要飲食配合,多食水果及蔬菜補充維生素好重要,好似蕃茄就對皮膚有太多好處,含有豐富胡蘿蔔素和維生素,而且仲有防曬、抗衰老等美容功效。

圖片來源:IG@nozomisasaki_official