港媽惡頂?怪獸港爸一樣咁麻煩!

鬧還鬧,至憎人問候或咒人父母!有網民目擊一名麻煩港爸,因不滿店員催促落單,開口埋口鬧人「死老豆咁嘅樣」,一啲文化都冇!

FB專頁「西客之道」刊登一篇網民投稿,指樓主早前到一連鎖快餐店打邊爐,前方一家三口落單要兩個牛肉鍋,因餐廳有兩款牛肉火鍋,店員追問時港爸唔耐煩講:「是但啦,牛肉鍋咪牛肉鍋,我理得你有邊款!」之後仲有湯底、粉麵等選擇,樣樣都要擾攘一輪先決定到,後面有客人忍唔住叫3人「諗好先買」!

港爸可能聽到唔憤氣,開始爆seed:「問問問,我要牛肉鍋你落個鍋咪得,問咩啫!」店員解釋揀埋飲品先完成下單,港爸爆粗發難,向收銀處旁經理投訴:「佢死老豆呀,X口X面」,經理保持禮貌,表示後面有好多客人等緊,要求佢先落單,港爸同老婆單單打打:「你睇下咩態度,點做經理,成間公司個個都死老豆咁嘅樣!」

經理面不改容,保持良好態度回應:「先生,我同我同事嘅爸爸仲在生,我哋唔知咩係死老豆咁嘅樣,唔知可以點幫你,麻煩你去後面等叫號碼。」港爸超激氣:「我要投訴你,我依家唔X食喇,食唔X落呀」,經理指可以退款,並稱「我姓黃嘅,多謝你嘅意見,拜拜!」

網民大讚經理EQ好高,唔同麻煩客人理論,亦無向客人野蠻行為跪低!另外網民亦批評「老豆阿媽教壞細路,我係佢個仔真係瘀到暈」、「好討厭啲人去到收銀先諗食乜,又多問題問!」

圖片來源:吉野家