獨居奶奶瘋狂炒工人 無個工人啱心水 介紹費都畀窮

好多獨居長者由於無親人24小時照顧,有好多孝心仔女都會請個工人同佢哋同住,希望可以「代」自己睇實老人家。連X討論區有位女網友就話,奶奶已經82歲,獨居,於是自5年前,老公就安排一個菲傭照顧佢。可惜唔夠一年,奶奶話工人「好食懶飛」,有嘢唔做好懶散,所以要炒咗佢;但其實兩公婆接觸過菲傭一年,覺得佢細心又有心機,完全唔覺有奶奶講嘅問題。但畢竟奶奶先係同佢住,可能個菲傭平日真係好懶散呢,所以兩公婆最後決定炒咗佢。

事情一直發展,5年來奶奶竟然先後炒咗4個工人,最短一個只係做咗2個月;而奶奶要炒嘅原因,包括懶、無禮貌、偷錢(報咗警但搵唔到贓)、自己衛生差等。每次炒人再搵工人,再請人都係錢,介紹費、機票、佣金等,每請一個都要額外畀差唔多2萬蚊。女網民話佢哋都只係普通家庭,家庭月入都4萬幾蚊,每次要請工人都係一大支出。老公有試過同奶奶傾,但老人家好硬頸,堅持要炒,炒完又即刻催促佢哋快啲搵新工人畀佢;最慘係連女傭公司都怕咗佢哋,唔係好願意去幫佢哋搵。奶奶當然唔會體諒,只係覺得佢哋老公婆唔肯出錢請,不停埋怨。

有網民就話除咗婆媳關係之外,第二難處理就係奶奶同工人關係,畢竟老人家本身已經唔係易相處,仲要一個外籍人士去一齊生活。而且照顧得老人家,都要識講廣東話;亦即係喺香港做咗好耐嘅經驗女傭,就算會出現奶奶所講嘅偷懶情況都唔出奇。要調解奶奶同工人嘅相處,最直接做法係控制一下老人家嘅期望,要佢明白工人始於同仔女唔同,照顧你個人,未必會同時照顧你心情,唔好立亂發脾氣,亦唔好太多其他要求。大家又覺得係咪?