獸性大發:同狗狗去行山 隨時中暑?!

天時暑熱,不過仍然有好多堅毅嘅朋友仍然一放假就走去行山,毫不畏懼天氣喎;而且有好多人仲唔單止人行,仲會帶埋家中毛孩,狗狗一齊行山。前幾年就曾發生一單慘劇,一個外國人家庭帶住3隻金毛尋回犬於炎夏行山,3隻狗都中暑然後死亡!好多人爭議話唔應該帶狗去行山;其實又未必嘅,只要準備功夫夠,做足以下安全措拖,帶狗狗一齊遠足行山,未嘗唔係一件快樂事!

帶食用水、帶水兜

咪以為山上有石澗溪水就可以,其實山水一樣會對狗狗唔好,引致細箘入侵,容易生病,所以自備飲用水同水兜最萬無一失。

用狗帶

唔好以為狗狗平時出街散步唔用狗帶都得,去到山上一樣得呀,因為狗狗喺山上可能會被其他事物分心走失,又或錯腳跌落山坑,所以必須用狗帶。

防蚊蟲

咪以為照用我哋用嘅驅蚊劑就可以呀,因為大部分驅蚊劑含有Deet,而呢種成分對動物有一定損害,一定要買可以人畜共用、不含Deet嘅。

舒緩運動

人做完運動要拉筋,狗行完山一樣要舒緩一下,幫狗狗按一按腳嘅關節,順便檢查一下狗狗有無感到疼痛不適。