用手機被誤會扮盲?視障人士:靠旁白語音就玩得!

雖然現今資訊發達,但香港人仍然好無知,又冇同理心,淨係識做「鍵盤戰士」公審人!

講緊早前有視障男被屈「扮盲搵食」一事,事緣有網民於「柴灣人柴灣事」FB專頁投稿,指發現有男人扮視障人士,大鬧佢「扮盲搵食」、「見到女人就黐埋去」、「一支箭衝去站頭插隊上車」,仲話見到對方識用智能手機,所以「都幾肯定佢唔係盲」。

原來事件嘅主角Tommy根本唔係扮盲,自6歲起雙目失明,17年以來一直靠手杖行路,有朋友通知佢被「點相」公審,覺得好委屈難受。全港唯一一間視障學校心光盲人學校亦隨即公開回應,反駁專頁不實言論,對事件感到非常遺憾及憤怒,「無知帶來網上欺凌,除了不尊重視障人士,對當事人心理亦帶來莫大影響。」

科技發達,視障人士可以用手機又有咩咁出奇?智能手機有輔助功能,可讀出唔同應用程式上嘅內容,又可以用唔同手勢掃屏幕,亦有語音操控等功能。就好似Tommy當日,就係用手機app查巴士到站時間,好多失明人士都係靠手機旁白及語音功能,去聽新聞、玩facebook、用WhatsApp傾計等,其實同一般人生活習慣分別唔大,普通人如果好奇或有唔明白嘅地方,不如主動關心問過明白,而唔係「眼見就當真」走去公審他人!

圖片來源:心光學校校友會