男人睇丁圖點解要讚要留言?

係呢個呃Like年代,男人打開FB便能隨時大飽眼福,除咗某啲sexy baby成日post好多丁圖,亦愈來愈多專頁以男人興趣為名,講車講酒更離不開講女。不過作為女性,有時真係唔明,睇還睇點解男人要讚要留言?難道你搏娘娘回覆,你丁得親切啲?定係想引娘娘注意,有望同佢出嚟食餐飯,甘願做隻兵?不過你知唔知當你讚或留言嘅同時,聰明嘅fb有時Share你like過嘅「肉照」,並大大隻字寫明「xxxx對此讚好」。簡單嚟講,即係公開話畀你女友、老婆,甚至全個fb朋友知道,你剛剛睇完囡囡相,並相當欣賞!其實,身邊唔少朋友都有類似尷尬例子,作為身邊人都唔知好嬲定好笑。

1. 向全校宣佈我係鹹蟲

某大學某學系助理,平時對背心短裙靚女同學照顧有加,add/drop科完全無問題,男同學或豬扒呢?「add唔到啦」一句KO你!佢Fb有加唔少學生,有同學話成日見佢大讚丁圖,並留言「So Pretty」、「Very Pretty」,而佢follow嘅page十個有九個都係女,個個波濤洶湧,其實你開個假a/c睇好過啦,而家全校都確認你係鹹蟲啦!

2. 老爺瘋狂讚好丁圖

朋友的老爺初學玩fb,只係識睇同讚,完全唔知自己讚過嘅野會畀人睇到。結果作為新抱嘅佢,每日都睇到老爺瘋狂讚好丁圖,唔係大波、半裸就長腿,搞到朋友見到老爺自覺老尷。

3. 一啖砂糖一啖屎

同事同老公慶祝周年紀念,事後老公好sweet地post合照,並tag佢話「多謝你這些年的照顧」,老婆睇到冧冧豬咗三秒,fb就顯示佢老公讚好另一張丁圖,立即咩mood都無晒!

4. 人哋老公好鹹濕

小編有位好姊妹,我全家都有佢同佢老公fb。有日,我阿媽同我講,「點解你姊妹個老公咁鹹濕?」我心諗人哋鹹濕你又知?然後佢就打開fb話,「我成日見到佢讚啲鹹濕相。」唉,所謂面就人地畀,架就自己丟。

相片來源: SYU Secrets facebook