男友同IG女神私聊當出軌?女友:唔咸濕點會Follow?

自FB、IG興起後,唔知捧紅幾多網上紅人,其中一批就係靠賣樣嘅IG女神,定時派「軍糧」,即係Show下胸、腿,日日吃喝玩樂、風花雪月,就自然有一大堆Followers。近日香X討論區有女網民就出Post呻苦,自己同男友都係30歲;男友平日都有Follow IG女神,睇下囡囡相。咁作為女友嘅佢其實一直都無出聲,更加無制止,仲話自己「作出最大忍讓」。不過唔知係咪男友見佢無阻止,近日得寸進尺,竟然開始私訊某啲IG女神,開始喺人哋啲Story到留言,仲要係大量漁翁撒網式咁,睇下有邊啲會回覆,再開始傾計。

成個過程最嬲係男友當住面做,例如出街食飯、喺屋企睇電視、甚至睇緊演唱會時都會。女友終於忍無可忍,直接同佢講「可唔可以唔好同啲IG囡囡傾計?」結果就開始爭吵,當然男友就話網上同人傾下計,只係好小事;但女友就明言如果再咁落去就當佢係出軌。有唔少網友都話女網友已經比一般女仔理性,起碼無阻止男友去Follow啲女神。不過大過都同意一點,就係所有男人Follow呢啲女神,終極原因都係咸濕。不過睇下相係一回事,直接同人傾計又係另計。大部分女網民都話唔可能接受自己男友同IG上其他唔識嘅女仔私聊。

至於男網友又點講?大部分都係一句:「個男人咁蠢㗎!點會當住面畀女友見到!」嗯,就係咁喇。