《留戀過去,即係同自己過唔去》 — B612

有返咁上下經歷,就會發現人嘅痛苦,好多時都係因為執著於一個念頭:以為件事仲有得彎轉

 
有時候,客觀條件明明好清晰,事實顯而易見:愛就係愛,唔愛就係唔愛,點都呃唔到自己嘅。明明知道已經唔可能繼續落去架啦,但又覺得自己付出咗咁多,唔甘心嚟到呢一步先放棄,所以依然會諗好多方法去挽回對方,甚至要貶低自己去迎合人都在所不惜。


被負面情緒困住,就係咁無奈,好似咩都做唔到咁。要解決現況,話易唔易話難唔難,就係你一定要接受 —— 其實所有嘢已經到此為止,正式劃上句號

係呀,無架喇,完咗架喇,你唔信都無用,真係得返你一個企喺原地唔肯走架咋。只要你肯認清呢一點,忍住痛下定決心同自己講:千祈唔好再睇返轉頭。好自然,你嘅重心就唔會再停留喺點樣改變一啲改變唔到嘅過去,而係點樣收拾心情計劃未來,令自己好過啲,將機會留返俾更好的下一位。


今日你企喺「而家」呢個時空睇返轉頭,先至明白原來當初流嘅眼淚都係不必要嘅。華麗轉身,唔單止係一種智慧,仲係對自己嘅一份尊重。

留戀過去,等於同自己過唔去。何必要苦苦糾纒,作踐自己呢?

***********************************

網絡作家b612 – facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」