《番工最怕遇到無恥之徒!》

有個朋友最近番新工番得好唔開心,新公司入面有個老屎忽,能力係零又專畀屎其他同事食,朋友話佢條Team嘅同事個個都有微言,個個都對佢避之則吉,明明做到出哂面,但係老屎忽依然故我。

職場上最可怕嘅人就係呢種毫無羞恥心嘅人。呢種人個腦好似少咗種功能,佢哋永遠都唔知道自己嘅位置,永遠唔識睇人眉頭眼額⋯⋯又或者佢哋根本就唔在乎,自我中心到唔需要理其他人點睇。呢種人嘅面皮異常厚實,正宗嘅老實不客氣,拎著數,攀關係,卸膊推責都完全唔會覺得尷尬,慘就慘在就算其他人已經反眼反到去後腦,佢都好似無事發生過,繼續天空海闊任佢行。

番工遇著呢種同事真係好可怕。你都係想安安落落打份工,偏偏每日就要畀佢激到爆血管,而重點係你喺度嬲到要殺人又好放火又好,佢都唔會知道,佢聽日都一樣會繼續激你,挑戰你嘅底線。

人無恥便無敵,當一個人無咗羞恥之心嘅時候,就無嘢可以再阻擋到佢。如果佢係你下屬,你都故且可以對住佢鬧又好發脾氣都好,但如果呢種人係比你更高職位更有地位嘅話,咁真係⋯⋯祝你好運。

港女友Facebook