《真愛唔係必然》 — B612

其實我係一個好相信緣份嘅人。唔好以為呢種人就一定好老套。我相信緣分,係因為我相信科學,相信機率。

有無聽過「摩菲定理」(Murphy’s Law)?即係「凡是可能出錯的事必定會出錯」。一件事,只要佢唔係完全無可能,機率上嚟講就一定會發生。

換句話講 —— 即係你瀨硬野呀!

單身貴族的你,係咪三不五時都會聽到身邊嘅人同你講:「唔洗驚架,你總會遇上真愛架,只係遲或早嘅問題。」

但你諗吓,成個地球咁多人……《秒速五厘米》都講過:「人一生會遇到大約2920萬人,兩個人相愛的機率是0.000049。」機會率低到咁,遇到本應就係好彩,遇唔到先係應該。

何況你未計……喂,相愛,係唔一定會走到最後架……你明我講咩架啦大家都身經百戰係咪先。所以呢,唔好大安旨意覺得個真命天子會自己中埋嚟,亦唔好成日FF最後會有幾幾幾幸福美滿……現實少少,你一定要學識自己一個人點生活,點同自己相處。獨活,係一個好難、好嚴肅嘅課題,而你又不得不面對。

呢個世界係冇所謂「完整的人生」,一定要結婚生仔、乜乜物物先得。就算最後真係一個人過,唔代表人生就無意義。生活仲有好多其他值得做嘅嘢,應該見識嘅事,一個人過活都可以自在得很、精彩得很。


係呀,你終於醒覺:你呢一世人係唔一定會遇到真愛架……問你死未?

***********************************
網絡作家b612 – facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」