眨吓眼就大個啦 4個長大後加入娛樂圈的童星

近排劇集《城寨英雄》咁鬼hit,不過焦點反而落咗喺一班配角身上,當中飾演智障人士「小智」嘅李日昇就被人大讚好戲,其實佢都係童星嚟架~除咗大家都知嘅美棋BB,不如今次就講吓其他4個長大後加入娛樂圈嘅童星啦:

1. 李日昇:入大台主力拍劇

近日喺劇集《城寨英雄》扮智障人士「小智」扮得入木三分嘅李日昇,自細就拍唔少劇集電影,至今拍過超過80套電視劇、15套電影,好似分別喺劇集《東方之珠》 同《溏心風暴之家好月圓》做郭晉安同 「管家仔」童年,又喺電影《黑社會》做影帝任達華個仔,仲有唔少對手戲架。6歲入行嘅佢一直都有Keep住拍劇拍戲,後來佢喺名校英華書院中五畢業之後,讀咗TVB藝員訓練班,仲加入埋TVB添。佢近日為「小智」一角特登請教前輩,又去庇護工場了解智障人士,落足苦功,唔怪得做得咁好啦。睇住佢大,希望有演技嘅李日昇可以得到多啲人賞識啦~

2. 丘竣霆(Shelton):闖內地樂壇

丘竣霆原名叫丘梓宏,細個嗰陣同弟弟丘梓謙一齊做童星,兩兄弟嗰陣幾靚仔架,而阿哥Shelton就出名啲,有「童星王」之稱。Shelton做過好多經典劇集,包括飾演劇集《一屋兩家三姓人》李逸朗個細佬「四少」、劇集《溏心風暴之家好月圓》嘅少年陳豪啦,電影都有拍過。當時佢又靚仔,演技又自然,所以好多導演監製都搵佢做主角嘅少年版。大個咗嘅佢依然靚仔,仲簽咗亞洲星娛樂做歌手,參加過內地歌唱比賽節目《中國好聲音》,去年推出首歌《虛構情歌》都唔錯架。

3. 莊錠欣(Elkie):韓國女子組合

莊錠欣拍超過20幾套劇集,好似喺劇集《怒火街頭》飾演陳敏之童年、劇集《On Call 36小時II》做吳啟華個女、劇集《老表,你好hea!》飾演少女萬綺雯。而且Elkie做過無線兒童台節目主持,又係家燕媽媽藝術中心成員同香港組合Honey bees的前成員,以前成日上兒童節目《放學ICU》到又跳又唱架。Elkie大個女之後因為被韓國Cube娛樂喺香港搞嘅選秀揀中,去咗韓國做練習生,今年仲加入韓國女子組合CLC,至今已經推出咗唔少迷你專輯呢~

4. 莫凱謙:歌手等出碟

2005年參加綜藝節目《殘酷一叮》,因為對答嗰陣一句「都係唱吓歌,玩下啫」,人細鬼大嘅佢一舉成名,仲被當時主持人尊稱佢做「莫生」。自此之後佢就被唔少TVB監製睇中搵佢拍劇,好似做過劇集《阿旺新傳》郭晉安童年、劇集《蒲松齡》馬浚偉個細路等。今年18歲嘅莫凱謙喺中文大學讀新聞與傳播系,亦都以歌手身份重返娛樂圈,不時喺YouTube上載作品,包括歌曲《無花果》、《今天只做一件事(Cover)》。

同場加映:

吳諾弘:劍擊新星

童星吳諾弘拍TVB劇集《心花放》出道,佢外型討好又得意,演技又幾自然,所以都拍過唔少劇集架,好似飾演劇集《宮心計》陳豪童年、劇集《公主嫁到》黃浩然童年、劇集《洪武三十二》馬德鐘童年。不過長大後嘅吳諾弘似乎對娛樂圈無咩興趣,佢之前憑劍擊考��名校拔萃男書院,近年都積極向劍擊運動員發展,今年參加法國「世界青少年劍擊錦標賽」得到男子花劍少年組個人第五名,又拎埋「2015-2016年度中銀香港紫荊盃」劍擊項目傑出男運動員獎,希望你可以成為香港體壇明日之星啦!

圖片來源:TVB.com、電影《黑社會以和為貴》、李日昇Instagram、李日昇Facebook、丘竣霆《虛構情歌》MV、丘竣霆Facebook、CLC@YouTube、Honey Bees《HONEY》MV、《今天只做一件事 - Cover by:莫凱謙》MV、莫凱謙Facebook、吳諾弘Facebook