睇戲有小朋友仲慘過坐飛機?全程聽人父母教仔

一句「小朋友係咁㗎啦!」真係難聽過粗口,唔知今次怪獸家長做咗咩「好事」呢?

話說有位女網民於fb專頁「生仔要考牌系列」撰文,大呻同男朋友到戲院睇卡通片時遇著怪獸父母,為氹個女睇戲而不斷嗌:「你睇吓啦!」又出動零食點知個女都係唔領情,仲要開iPad睇《多啦A夢》!兩人全程慘被呢家人騷擾,專心唔到睇戲,忍唔住開聲叫佢哋靜少少,但家長冇理,仲話:「小朋友係咁㗎啦!」令女網民非常無奈。

個個都識唱「唔該熄咗你個電話啦!」呢首電影禮儀歌,但又有幾多人可以守到當中嘅規條呢?除咗小朋友冇王管、大聲叫喊令人煩爆,仲有咩行為會令你討厭呢?

1.討論劇情

先勿論大聲細聲,戲院咁靜,細細聲已經會騷擾到附近觀眾。其實大部分觀眾同你一樣未睇過套戲,有疑問嘅話就算同行友人都未必可以解答你,與其因討論而錯過劇情,又滋擾到別人,不如完場先盡情討論啦。

2.踢凳

睇一場戲至少坐一至兩粒鐘,轉換坐姿在所難免,加上座位前後距離窄短,一兩次唔小心踢到前方椅背都情有何原,但最怕有人整場戲每隔幾分鐘就踢你一次,準時過食藥!

3.狂玩手機

就算較咗靜音,都唔代表玩電話就唔騷擾到人。漆黑中嘅電話螢光幕,破壞力就好似死光咁強,不停拎部電話篤篤篤,好影響到身邊人嘅觀感。

4.食嘢

戲院一般都係提供爆谷或熱狗,氣味冇咁重。好餓又嫌戲院食物太貴嘅話,要外賣食物最好食件三文治填肚好喇,聞到快餐店豬柳蛋漢堡或薯條味叫人點頂?你估睇緊4D咩!另外,食得太大聲亦係一種滋擾,最好留意一下。

圖片來源:百老匯