究竟百日宴係為乜?係為滿足港媽虛榮心

港媽幫寶貝仔女擺百日宴已成一大潮流,有港媽早前於網上訂購以動畫《波士BB》為主題嘅candy corner作為仔仔百日宴佈置,點知宴會當日店員唔只遲大到,甜品如cupcake、macaron生日帽等完全貨不對辦,糖皮似泥膠、馬卡龍碎到四分五裂,好離譜。

港媽當然唔收貨,店方堅持拎走補獲再送嚟,點知啲cupcake只係剷走塊糖皮再求其唧啲白色cream算,港媽簡直嬲到喊,用咗$2,600買咗堆輻射甜品,店家事後仲失埋蹤,港媽惟有上網打千字文投訴呢間不負責任嘅甜品店。

唔少網民對都好同情港媽遭遇,紛紛留言:「嘩!咁做生意都有」、「去美心買個獨角獸蛋糕都冇咁激氣」、「學藝未精就唔好出來害人啦」、「冇heart就唔好學人做生意啦」,亦有網民突破盲腸:「個仔大個表示完全唔記得有啲咁嘅事。不過真係幾嬲嘅…」

問心,百日宴對BB真係咁重要?其實,只係對父母重要吧,而且好多人都有啲唔健康嘅心態:

1.虛榮心

眼見人哋百日宴咁大排場,葡萄之餘,覺得自己都不容有失,於是有咁豪得咁豪,場地布置、甜品檯最緊要有得呃like,跟手影多啲相哂靚B,再幫個bb開個page當明星又點話,到頭來…只係兩公婆自high啫。

2.貪錢

有啲父母會利用擺酒賺錢,之前網上都有個帖文,一位網民個老爺去親戚搞嘅百日宴,點知當親戚收齊利是後,居然帶班叔伯兄弟去茶餐廳食百日宴,仲好豪咁叫大家隨便點,激到個個彈起。

3.咩人都請

BB百日宴,一家人食餐飯就夠,唔太熟嘅疏堂親戚都未必要請,但有啲父母覺得朋友、同事老奉要出席,咩人都請一餐,有網友留言話曾經有同事邀請佢出席百日宴,佢好直接咁講:「你個仔關我咩事?」