納米樓開放式悲哀 兩公婆難夾熄燈時間

香港呢個畸形社會,產生嘅係大量納米盤,只有200呎左右,有啲甚至連一個車位都唔夠嘅單位,買嘅不乏新上車嘅小家庭,兩公婆住200呎開放式,可能好多人都會以「皇帝都係瞓張床」去解釋,又或者覺得夜晚返到屋企都係瞓覺,唔使咁大。但實際上住落,兩公婆發生嘅問題可以係意想不到咁多,更加係非常到肉。近日於香X討論區財經版有女網民話自己去年結婚後就搬入元朗一個只有213呎嘅開放式單位,作為新婚之用。雙方開頭都覺得住細少少,最多咪逼啲,唔會有其他問題,但原來最煩竟然係開燈習慣!

女網民話自己做老師,平日要一早六點起身,所以晚上10點左右就要瞓覺,而且一向醒瞓又怕光,以前瞓覺一定要熄晒燈;但老公係做維修人員,下午先開工,平日夜晚都係2、3點先瞓。如果普通單位,老婆大可以入房瞓,可惜住納米盤大家朝夕共對,連瞓覺時間都分唔開。女網友就話老公雖然已經張電視校到好細聲,但奈何仲有少少聲加埋枱燈,遇到醒瞓嘅佢真係難以入睡,試過戴耳塞同眼罩,但唔習慣反而仲難瞓得著。試過同老公夾作息時間,但老公試過想早少少瞓其實都瞓唔著,變咗喺床上玩電話,一樣係光燦燦。

唔少網民都話深表同情,但兩公婆相處問題有時唔限於住所幾大,有人住3,000呎大宅,一樣同伴侶有其他問題要處理。要走出困局,必須兩公婆同心協力去解決。不過納米盤的確係呢個問題嘅根本,係惡之根源,唔知尚有幾多香港年輕夫婦都有類似情況,更莫論連納米盤都住唔起,要住板間劏房嘅家庭。香港人,點解要咁可憐呢?