老婆愛充大頭鬼 勁買貴價月餅返嚟扮人哋送

中秋就到,月餅廣告四圍都係,事關月餅係非常大嘅市場,好多飲食集團全年嘅最高收入都係靠月餅得返嚟;以致大家所見近年好多非傳統月餅公司、甚至明星藝人都以個人名義出月餅,爭飯食。而家月餅多數用統一工場製造,成本少,利潤大,一盒賣到2、3百蚊都係等閒。有男網民近日於「連X討論區」出Post呻苦,話自己同老婆做小生意,開貿易公司,每個月賺埋都係剛剛好,勉強養得掂自己兩公婆。而每年一到中秋,老婆就會大曬金錢購買名貴月餅,往往要用炒價去買,買完之後好大部分係送畀客人,或者「潛在客人」,用嚟打關係,老公都話咁係可以接受,但最唔明係,幾乎另外一半係老婆買嚟扮其他客人送嘅,係做個樣畀真客人睇,營造到自己公司好有規模。

延伸投票:近年好多藝人以個人名義推出月餅,會唔會試?

男網民就話老婆一年比一年買得多,今年已經用咗5萬幾蚊買月餅,其中有廿幾盒就放咗喺公司,一有客人上嚟傾生意時,就會話係其他人客送。對於呢個充大頭鬼行為,老公係不以為然。首先,咁係呃人,係誠信問題;再者,成本太高,但效果都唔可以量度,在商言商而言係「錯誤投資」。唔少網友都話,呢個都牽涉男女做生意嘅手法,女人係愛面子、重門面、而且覺得生意講嘅係公司派頭,所以要建造公司「撈得好掂」嘅形象。相反男人就係重實際,講嘅係成本效益,所以任何睇落無著數可言嘅行為都唔應該做。

事實上又無話老婆嘅行為啱定唔啱,畢竟做生意嘅嘢,有時真係靠老細嘅個人手段,任何人都有自己擅長嘅方法。不過呢個Case麻煩在於有兩個老闆,意見不合一定產生矛盾,建議一定要攤出嚟傾,唔可以收收埋埋。不過討論仲有後續,就係有好網民關心最後啲月餅食唔晒點算喎,叫佢記得過期前要捐出去,唔好浪費!