【聖誕禮物推介】聖誕送禮勤 男朋友系列

聖誕普天同慶,理應係全世界都開心嘅日子,當然其中有伴侶嘅更覺溫暖(好似係),而且唔少得互相交換禮物!不過每年要交換禮物都好講心思,一唔小心隨時買著啲得物無所用嘅物品,嘥錢嘥心機。話畀女仔知先,千萬唔好DIY整禮物畀男友喇,任你整3日3夜通宵,都肯定唔及以下任何一件遊戲機產品令佢咁開心。雖然係殘忍,但係真係事實!

PS Classic

同之前炒到癲嘅迷你任天堂一樣,呢部迷你版Playstation內含20隻經典遊戲,包括《Metal Gear Solid》、《Bio Hazard》等,宜家仲要限量推出,好難先撲到一部,送畀男朋友,包你全年有運行!

LEGO消防局

除咗打機,LEGO都係男人沉迷嘅玩具之一,每年LEGO都會推出聖誕主題,今年比起之前出咗幾年嘅市集唔同,係聖誕消防局,有架靚靚消防車同6隻人仔,仲有個消防員銅像。正呀!唔好買錯,號碼係10263 。

DJI Osmo Pocket

女士們可能唔知,DJI即係目前航拍機之王,嚟緊盛傳DJI踩過界會推出一部雲台相機,即係類似GoPro,而且連埋雲台都短到一隻手掌咁細,有晒穩定器功能,可以話係GoPro新競敵,買畀男朋友同你去旅行用,諗得過!

Bose SoundSport Free

講到2018年大熱Gadget就梗係要數到藍芽耳機,幾乎人人都買咁濟。不過唔好只係識Apple隻AirPods,如果男朋友係運動型嘅就應該配返一隻專門做運動用嘅藍芽耳機!