自攜污糟杯買飲品 港女鬧店員「你唔識幫我洗?」

環保議題越來越多人討論,好多餐廳都鼓勵客人少用外賣即棄餐盒餐杯,不過如果自備嘅餐具有污漬,又係咪老奉要店員幫你洗?

近日有餐廳店員向FB群組「西客之道 Hispitality Secret」投稿,任職餐廳歡迎顧客用自攜杯,早前一名食客帶同自攜杯買外賣凍飲時,樓主發現杯內有小量咖啡漬,並指「擺明係飲完冇洗直接畀我哋」,於是建議食客改用紙杯或自行清潔摺杯。

點知對方聽完即變臉發爛,大聲鬧樓主「唔識幫我洗架咩?又話支持環保又唔肯做多幾步?」樓主為免麻煩只好屈服,幫對方洗乾淨隻杯再裝凍飲入去。事後樓主坦言:「係有心環保嘅就唔該唔好攞個勁污糟嘅杯買外賣,食落肚嘅有咩事我哋都要負責!」

唔少網民批評食客:「同環保無關,同人品有關」、「自備杯唔洗就唔應該要人裝落去,肚痛又賴人」,同時亦認為樓主「千祈唔可以屈服」、「屈服=縱容!開頭你又話怕麻煩,最後又叫人擺上網,想點」、「西客堅持咪就咁入落去,我理得你隻杯污糟!」

圖片來源:Starbucks