茶水間:公平咩?肥人返工預咗蝕底

近年多得欣宜,展現真我大無畏,覺得肥就肥,無需理別人目光,活出自我最緊要。小編係欣賞佢嘅勇氣同堅持嘅,不過人哋係歌手,專業係唱歌(仲有身家雄厚);試諗下現實當大家係打工仔,肥又係咪一個值得自豪嘅地方?如果我話你知,肥人喺公司無歧視,你都唔信啦!外國著名HR資訊網站Evil HR Lady主持人Suzanne Lucas就直接講過:「肥,絕對會阻礙搵工。HR都係睇觀感,而外表係最快標纖一個人嘅方法。」網上亦有唔少肥人分享一啲公司嘅不公平待遇,大家睇睇。

售貨員無得升

有網民話自己係肥人,做售貨員,同公司做咗5、 6年,但都無被升職;返而一位靚女同事做咗1年半就被擢升,調去其他旺區嘅大店,明顯覺得自己被歧視。

公司苦力

有返Office肥仔表示,公司同事成日借頭借路叫佢幫手搬嘢、換水等,仲要講一句「你咁大份,無難度啦!」令佢好似變成苦力一樣任人猜遣,不是味兒。

發配邊疆

坐Office嘅女同事由於身型肥,被安排坐喺公司最角落,因為老闆話唔希望客人一上嚟就望佢先,反而安排後生美女坐最前,營造公司好Young嘅形象。