茶水間:從來無聽過「隱蔽青年」會出喺有錢人家

隱蔽青年,呢個自從十幾年前已經有嘅形容詞,第一代嘅代表人物絕對係「阿源」;近日又有電視台節目,追縱一班目前喺香港嘅隱青。其實佢哋大都有一個共通點,同屋企人住喺公屋、吃喝食住都有家人照顧、曾經喺公開考試中失敗,然後就一直隱於家中,日日打機,唔去搵工作唔去旅行。總之生活開支都係來自遊戲機以及飲食。不過有個好直接嘅問題,就係從來呢班人就叫隱青,人人喊打,話佢哋係蛀米大蟲;但話畀大家知,如果家境好嘅,佢哋係富二代的話,絕對肯定佢哋唔會做隱青,點解?

有錢去玩叫「享受人生」

無錢,又唔想做嘢,咪日日留喺屋企打機,因為可以話零消費;但屋企有錢,咪可以周圍環遊世界,日日去唔同地方吃喝玩樂,到時呢啲仲可以畀人欣賞,叫做「識得享受人生」。

有錢開公司做傑青

做富二代,又唔想返工做嘢,又想打機,可以點?咪問Daddy拎啲錢搞下生意,就一於做E-Sports,自己做老闆又可以打埋機;加上啲人脈關係,隨時政府頒埋個傑青畀你多謝你為電競爭光添呀!

有錢有交際有朋友

無錢自然無活動,無活動自然無朋友,莫再幻想係女朋友;有錢就唔同,大把酒肉朋友,大把異性朋友,到時你唔使怕諗唔到活動,想宅喺屋企打機都難;實大把人介紹玩意畀你!