茶水間:一世人最多都係搵4萬蚊 甘唔甘心?

大學生咁多年以嚟嘅入職人工中位數都係萬幾蚊,如果一個正常打工仔大學生,要做到有4萬蚊人工,究竟要幾耐?相信就算係咁轉工、升職,要有4萬蚊,可能都起碼要5、6年時間,仲要係好彩嘅話。日前討論區就有一個充滿兩難又帶有哲學意味嘅問題。樓主話考到公務員,頂薪點可以去到4萬,不過除咗每年加薪之外,都唔會有得再升或者調去其他部門(之前都未有喺呢個位嘅人試過),即係好大機會做一世都係呢個職位。結果反應都好兩極,有人話「香港唔知幾多人做一世都無4萬一個月」;亦有人話「到你25歲你就會後悔」。其實好明顯睇出「4萬蚊」就係香港咁貧富懸殊嘅分別,有人覺得係「一世都無」,有人直接鄙視。不如睇下月薪4萬,係代表緊乜嘢?

全港最Top 14%

根㯫2016年政府中期人口統計,全港月薪4萬或以上,只有14%人;即係你有4萬月薪,已係贏咗差唔多9成打工仔。

可供500萬樓

買樓當然要講計數,如果你係首置又有首期的話,月入4萬就啱啱做到500萬樓嘅按揭同壓測喇。

偽中產零福利

進入月薪4萬,已經正式算係「高不成低不就」;首先一切低層福利例如公屋、派錢等無你份;但要供樓、養仔女,真正嘅N無人士。