茶水間:中學年代 原來先係人生最美好時光

香港地生活壓力大,工作繁重,好多時根本係每日營營役役過日子。無樓嘅朋友想賺好多錢去買樓;有樓嘅朋友又要不停保住份工去供樓。突然發覺,自己已經踏入中年,再轉眼間,人生可能好快已經走咗一半。日前有人喺討論區話,發現人生最美好嘅時光,原來一直都係停留喺中學。的確,大家中學生時都希望唔使讀書,快啲畢業可以做嘢賺錢,但回想起嚟,反而中學先係最自由自在嘅歲月。中學有幾愉快?

最好嘅朋友

好多人一生人最好嘅朋友就係中學同學,大家一齊經歷令人戰戰兢兢嘅青春期,一齊去衝破所有當中嘅疑問,當中無污染無機心嘅友誼,係工作之後絕對難以搵到,所以中學時時結識嘅朋友,就係你一世嘅朋友!

盡情地戀愛

無咗要OT返工,無咗愛情上種種心機盤算,中學時嘅戀愛最純真,畢竟大家都係情竇初開,對戀愛都係一知半解,兩個人從相識至暗戀,最後走埋一齊探索呢個未知嘅領域!

無條件失敗

講緊係自己搵自己方向,例如自己興趣所在,自己日後要從業咩行業,好多呢啲決定都係中學時期開始,大可放心去試去做每一樣想做嘅事,學校又好外面又好,可能係你日後投入社會嘅踏腳石。