茶水間:別讓自己經常把「男女平等」放在嘴邊

今日係3月8日三八婦女節,無界各地都有女權團體遊行示威,爭取男女平等權益。唔睇香港,放眼世界,的確好多先進國家例如美國,依然存在男女同工不同酬嘅情況,非常唔公平。至於香港,真係可以話調轉去睇,君不見大公司中幾多老細級人馬都係女人咩?女強人可以話香港特產之一,一位事業有成、兼顧家庭嘅中產女士,可以話比比皆是。好多人都話,今日香港要睇嘅唔係男女平等,係點樣令自己唔好因為太過偏重女士權益,而導致被人稱「女權份子」。要唔成為過份偏激嘅女權份子,除咗唔日日夜夜張「男女平等」放喺口邊之外,仲有咩嘢呢?

不以湊仔為理由

好多女性喺辦公室做嘢,推Job或者做錯事之後,就會搵屋企做理由;例如話「要湊仔」、「幫仔仔做功課」等等。其實全世界都知得女人可以生仔,但搵湊仔做理由?難度爸爸又無份湊?點解唔聽見男人咁講呢?

不以體弱為理由

好多女人喺職場上,尤其服務業,都好鍾意用身體弱去抗辯,將所有粗重工作推畀男人。其實,如果係工作上包括嘅職責,男性員工多數肯自願幫手頂(有風度的話),而如果職責上唔包,亦無理由男人要頂。

不以性別為理由

唔明?好多時工作上有爭拗,或者有錯漏,如果一位女性同一位男性互相對峙,女性好多時會站喺同一邊,然後以「男人老狗蝦女人」、「好男不與女鬥」之類嘅說話,明顯係對性別不對事,咁點樣工作落去呢?