茶水間:劣幣驅逐良幣 公司瘀血三大特徵

一間公司無論人多人少,總之就一定有大量人事關係同是非問題。好多時一間公司成功與否,最講究係人,員工嘅質素就係注定公司可以有幾成功嘅主要原因。好多老細都唔明白,點解公司愈做愈霉,明明不斷改變公司方針,但好似永遠成功唔到;好明顯就係人嘅問題囉!任何公司都係一樣,劣幣驅逐良幣,即係點?咪就係愈差愈懶嘅員工,好快會傳染到全公司,而勤力嘅員工,亦會因為公司呢班瘀血,覺得自己勤力係對自己唔公平,唔甘心得自己做嘢,繼而一係變埋懶散員工,一係離開。久而久之,全公司都係瘀血,公司就玩完啦!咁呢啲瘀血有咩特點?

長期扮工

做得瘀血,當然係不事生產,但同時要經常扮有嘢做,扮自己好能幹,處理所有雞毛蒜皮嘅事都要大鑼大鼓咁話人知,最緊要係令人覺得自己好重要!

恥笑勤力員工

作為瘀血唔單止係阻住咁簡單,直情係要排除良血,因為其他真係想做嘢嘅員工,係一定嘅威脅,因為會出盡全力恥笑佢哋「咁勤力搏有獎咩?」

吹水打關係

做得瘀血嘅通常明白群眾力量,合則強,所以一定會喺公司四周打好關係,結成一黨,互相補位,甚至互相合作;返工當然就會係周人吹水多過做嘢啦。